الطموح

في واحد راح هو ومرتو تَ يعملو شهر عسل عَ جزيرة من هالجزر السياحيّة، يلّي قلال العالم لي عايشين فيها.

وهو كاين من نوع الشباب يلّي مأسسين حالهن، وطموحين عالآخر. وأكيد هو شاب تعبان بحياتو.

المهم، هو وعالجزيرة، كان قاعد هو ومرتو عالشَّط بكَير الصبح، عم يستمتعو بالشمس الشارقة جديد، ولون المَي أزرق ولا أصفى من هيك. شي متل الحلم، بتفَكِّر حالك بالجَنّة. فجأة بينتبهو لَ صيّاد سمك عم يتصَيَّد على صخرة قريبة منهن. كل ما يكبّ السنّارة بالمَي، دغري بتعلق سمكة بالسنّارة. شاب صيّاد حَرّيف يعني. بِقوم العَريس بيوقَف حدّو وبيتفَرَّج عليه بدهشة. أوَّل مرّة بِشوف هيد صيّاد سَريع. بِقوم بيفتح مَعو حَديث:

– كم سمكة بتتصيّد بالنهار؟
– سمكتين… وحدة لإلي، ووحدة لمرتي
– بَس سمكتين؟ ليش ما بتتصيَّد أكتَر؟
– ليش بَدّي أكتَر؟
– يا خَيّي فيك تبيعُن!
– ليش بَدّي بيعُن؟
– بتبيعُن، بتطَلِّع مَصاري…
– ليش بَدّي طَلِّع مصاري؟!
– بتصير توَسِّع حالك، بتجيب حَدا يساعدَك!
– ليش بَدّي أعمل هيك؟!
– يا عَزيزي، بتفتح مسمكة، وبتصير تبيع!
– مسمكة؟ شو مسكمكة؟! ليش بَدّي بيع؟!
– ما إنتَ بتصير تجَمِّع مَصاري، وبتتوَسَّع أكتَر، بتفتح فروعة بكل أنحاء العالَم.
– ما عم بفهم عليك، شو الهَدَف؟
– رَح تهبلني! بتجَمِّع مَصاري، بِصير مَعَك لآخرتَك. وآخر شي بتقعد بترتاح مبسوط إنتَ ومرتَك.
– طَيِّب ما مرتي وأنا مرتاحين ومبسوطين من هلأ… ليش بَدّي لف ودور ووَجِّع راسي؟…
– …

الغاية إنّو، بما إنّو كل شي بالحَياة نسبي. الأشي يلّي بتبسطك إنتَ، مش ضَروري تبسط غَيرَك. كل واحد عندو أهدافو بالحَياة.

بَس في ناس فاهمين كيف يكونو مبسوطين ومرتاحين من هنّي وصغار…

5 thoughts on “الطموح

  1. مني عآرفة ايش اقولك بس بجد انبسطت كتير بالبلوق تبعك حروفك خفيفة وافكارك واعية جداً ..مرة مرررة شكرا

  2. مساء الخير ..وايد حلوة هالمدونة في أفكار رائعة ..أستمر!شكرااا

Leave a Reply

Your email address will not be published. Required fields are marked *