معسّل

– أهلـاااااان حَبيبي، كيفَك؟ تفَضَّل قعاد.
– لا والله يا ريت، مستعجل بَدّي إمشي.
– ولك يا خَيّي شو في وراك؟ بدَّك ياني صدقَك؟ ما إنتَ لبناني، ما في شي وراك، يلّا قعاد عندي كم شغلة خبرَك ياهن.
– طيّب بقعد بَس مش مطَوَّل، هيت لَ نشوف، شو بدَّك تخبّرنا؟
– والله يا صَديقي في عندي كَم معلومة بفيدوك.
– هيت لَشوف، متل شو؟
– أوكي، إنتَ عارف إنّو أأمنلَك تركَب بطيّارة من إنَّك تركب بسيّارة أو تركب عَحمار؟
– حلو، رَح أخدها بعين الإعتبار، من هلأ ورايح كل تنقّلاتي رَح تكون بالطيارة أو بالسيّارة، بلا الركوب عالحَمير، أصلاً بتطلع ريحتك وهيك. خلص أنا بُكرا نازل عالشغل بالطيّارة. شو عندَك غير؟
– طيّب، إنتَ عارف إنّو إذا الرجّال ما تجَوَّر، بيقصَر عمرو عشر سنين؟ ليش ما بتتجوَّز؟
– يا خَيّي شو فارقة مَعَك إذا بتجَوَّز ولّا لأ؟ شو مأثّرة عليك؟ فيك تحل عَن سما ربّي شي شوَي؟
– لأ بَس إنّو أنا بَدّي مصلحتَك
– ما بدَّك مصلحتي ما بدَّك شي، أنا عارف ليش بدَّك ياني إتجَوَّز، بَدَّك تروح تاكل أكل ببلاش، بتقدّيها بالمطاعم، كل مصرياتَك راحو عالأكل، مش شايف حافك كيف رايح بالعرض؟
– ولك بلا مسخرة هلأ، أنا جسمي هيك نَوعو.
– طَيِّب بخاطرَك، بَدّي إمشي، وصّينا.
– طَب ما إنتَ ما خبّرتني شي، هيك دغري عالماشي بدَّك تروح؟
– أصلاً إنتَ شو قاعد عم تعمل هون بنص النهار؟
– والله جيت طلبت أركيلة، هلأ عم يعملّي ياها، جايب معَسَّل عَ زَوقَك بيعجبك.
– طَيّب أنا في عندي معلومة بتفيدَك مزالك هيك.
– والله؟ إيه هيت لَشوف، سمّعنا.
– إنتَ عارف إنّو إذا بتضَل عم تخبط راسك بالحيط، بتحرق ١٥٠ كالوري بالساعة؟ أنا برأيي تقوم تبَلّش هلأ لأن هاي الطريقة الوَحيدة لتضعَف، يلعن عرضَك متل الخنزير صاير.
– يا خيّي شو بيك؟ أنا الحق عليّي عيَّطلَّك تقعد مَعي، قوم فل من وجّي.

Leave a Reply

Your email address will not be published. Required fields are marked *